June 27, 2011
Олон түүхт үйл явдал давхацсан энэ жилийн Үндэсний их баяр наадмаар Цэргийн ёслолын жагсаал явах юм. Өнгөрсөн 5 дугаар сарын дунд үеэс өөр, өөрсдийн анги, салбарт хүн нэг бүрийн, эгнээний, болон нэгдсэн бэлтгэлээ базаасан тэд энэ сарын 20-ноос БХИС-ийн жагсаалын талбайд ёслолын жагсаалын нэгдсэн бэлтгэлээ эхлүүлээд байна. Ирэх сарын 8-ны өдрийг хүртэл үргэлжлэх хугацаанд Зэвсэгт хүчний 337 дугаар ангийн байрлалд хоёр удаа зэвсэг техник, морин жагсаал оролцсон иж бүрэн бэлтгэлийг хийх аж. Энэ тухайд ЗХЖШ-ын АУГ-ын ахлах мэргэжилтэн, хурандаа Д.Пүрэвдоржоос тодруулжээ.
Ёслолын жагсаалд ямар бүрэлдэхүүн оролцох вэ?
-Ардын хувьсгалын 90 жилийн ой, “Монгол Улсын төрийн далбааны өдөр”-ийг тохиолдуулан Цэргийн хүндэтгэл, ёслолын жагсаал 7 дугаар сарын 10-ны өдөр жанжин Д.Сүхбаатарын талбайд болно. Томоохон энэ арга хэмжээнд ЗХЖШ-ын ҮЖҮНХ, БХИС-ийн ЦХС-ийн бөмбөрчид, ЗХЖШ-ын бүтцийн нэгжүүд болон ЕЗЦК, АДХЦК-ын харьяа анги, салбаруудын бие бүрэлдэхүүн, Улаанбаатар цэргийн хүрээний Хүндэт харуул, ХХЕГ, Дотоодын цэрэг, ШШГЕГ, ОБЕГ-ын бие бүрэлдэхүүний төлөөлөл гээд нийтдээ 2000 гаруй цэргийн алба хаагч оролцох юм.
Техникийн болоод Морин цэргийн жагсаал мөн явах байх аа?
-Тийм ээ. Сүүлийн үед Зэвсэгт хүчний зэвсэглэлд шинээр нэвтэрсэн зэвсэг, техникийн төлөөлөл, Зэвсэгт хүчний 337 дугаар ангийн нисдэг тэрэг, 232 дугаар ангид шинээр зохион байгуулагдсан морин дивизионоос Морин цэргийн жагсаал оролцох учраас ёслолын жагсаалын ажиллагааны сүр, хүч улам нэмэгдэх нь ойлгомжтой.
Ард түмэн хуучнаар шөнийн парадыг тэсч яван хүлээдэг дээ?
-Хүн, морь, зэвсэг, техник оролцсон иж бүрэн бэлтгэл 7 дугаар сарын 4, 6, 8-ны шөнө Д.Сүхбаатарын талбайд явагдана.
0 Сэтгэгдэл:
Post a Comment